Preekriglyne

Romeine 11:1-2a, 29-32 – 20 Augustus

Twaalfde Sondag in Koninkrykstyd

Sluit met Familietyd aan by die gedagte van God se genade teenoor ongehoorsame mense. As jy die boek betyds in die hande kan kry, lees David Shannon se “No, David, No!” of wys die video daarvan: https://www.youtube.com/watch?v=2QV1X3u1o3c Dit is ’n reeks prente van ’n seuntjie wat stoute goed doen en sy ma wat die hele tyd met hom raas. Maar in die twee laaste bladsye sê die ma: “Yes David. I love you.” God ontferm hom oor ongehoorsame mense. Wanneer ’n mens die hele Romeine 11 lees, leer ons dat ons nie ons verlossing kan verdien nie – dit is ’n geskenk van God. David moet die hele tyd “nee” hoor, maar uiteindelik het hy berou en hardloop in sy ma se arms in, waar sy hom met liefde ontvang.

In sy bediening het Jesus alle mense opgesoek, Jode en ook heidene. In Markus 7: 25-29 lees ons van Jesus se reis na heidense gebied, in die omstreke van die stad Tirus. Hy wou nie hê die mense moet weet Hy is daar nie. Tog kom ‘n Griekse vrou, gebore in Siro-Fenisië (heidense gebied, ‘n nie-Jood) na Hom toe, kniel en vra dat Hy haar dogtertjie van ‘n bose gees bevry. Die vrou gaan in debat met Jesus… en dan betoon Jesus aan haar genade. Haar dogter word summier bevry.

Hierdie verhaal in heidense gebied getuig dat Jesus se bediening aan Israel, en God se betrokkenheid sedert Abraham by hierdie volk wat uit Abraham voortkom, uiteindelik die hele wêreld sou omsluit. Paulus se worsteling met die ongehoorsaamheid van die Jode in Romeine 9 tot 11 is daarom ook vir ons belangrik. Want hy toon aan hoe God dit gebruik het om genade te betoon – aan Jood sowel as heiden, aan Jood, sowel as Afrikaners, Engelse, Russe, Arabiere – noem maar op.

Laai af: Word – PowerPoint

Romeine 10:5-15 – 13 Augustus

Elfde Sondag in Koninkrykstyd

Daar is vier lekker opsies wat jy verder kan ontwikkel vir die familie-oomblik. Maak seker dat jy net een gedagte kies en dit eenvoudig hou. Die eerste verduidelik die verlossing met hierdie oulike hulpmiddel. Die tweede haak aan by hoe liefde klink. Die derde is opgebou rondom die verhaal van Strictly No Elephants deur Lisa Mantchev. Hier is ‘n video. Opsie vier borduur voort op die konsep van lieflike voetstappe met gumboots, of hoëhak skoene …

Die preekriglyn skop af met die verhaal van Edward Kimball, ‘n assistent in ‘n skoenwinkel in Chicago. Hy was ook ‘n Sondagskoolonderwyser, en het ure van sy vryetyd spandeer deur straatkinders in Chicago se middestad op te soek en hulle van Jesus te leer. Deur sy getuienis het ‘n jong seuntjie, D.L. Moody, in 1855 tot geloof in Christus gekom. Moody het ‘n bekende prediker geword. In 1879 kom F.B. Meyer deur Moody se getuienis tot geloof in die Here. Meyer het ‘n prediker geword, en J.W. Chapman na die Here gelei. Chapman het ‘n prediker geword, en die boodskap van Christus aan ‘n basketbalspeler, Billy Sunday, gebring. Billy Sunday het herlewingsdienste in Charlotte, Noord-Carolina gehou, wat soveel impak gehad het dat die evangelis Mordegai Ham genooi is om in Charlotte te kom preek. Onder Ham se prediking het ‘n tienerseun, Billy Graham sy lewe vir die Here gegee. Graham het die goeie nuus met passie wêreldwyd gedeel.

Dit het alles begin met een man wat na die strate uitgereik en ‘n tienerseun in ‘n skoenwinkel vertel het dat die Here hom liefhet. Dit laat mens aan Paulus se woorde dink: Maar hoe kan ’n mens Hom aanroep as jy nie in Hom glo nie? En hoe kan jy in Hom glo as jy nie van Hom gehoor het nie? En hoe kan jy van Hom hoor sonder iemand wat preek? En hoe kan iemand preek as hy nie gestuur is nie? Daar staan ook geskrywe: “Hoe wonderlik klink die voetstappe van dié wat die goeie boodskap bring.” (14-15)

Laai af: Word – PowerPoint

Romeine 9:1-5 – 6 Augustus

Tiende Sondag in Koninkrykstyd

Herinner almal aan Paulus se lewensverhaal. Hy was ’n ywerige Jood wat aanvanklik die Christene vervolg het. Toe gryp Jesus in en verander sy lewe! (Vertel die verhaal van Paulus se bekering.) Gesels oor mense wat nie vir Jesus dien nie. Wees egter baie versigtig – onthou, kinders dink baie letterlik! Gesels met hulle daaroor dat Jesus enige iemand kan verander. Bevestig dat ’n mens kan bid vir mense. Begelei kinders om vir spesifieke groepe of mense in gebed in te tree.

Ons teks vir die preekriglyn, Romeine 9:1-5 vorm die inleiding tot die drie hoofstukke (9–11). Opsommend kan ons sê die gedeelte handel oor die intense droefheid wat Paulus ervaar oor die feit dat die meeste van sy volksgenote nie in Jesus Christus glo nie, ten spyte van die bevoorregte posisie wat hulle in God se geskiedenis met mense beklee. Die dilemma is dat die Jode strykdeur die voorrang geniet het in die verlossingsgeskiedenis waarop die evangelie gegrond is. Die oorgrote meerderheid Jode het hul rug op Jesus gekeer. En vir Paulus stel dit die hele evangelie wat hy verkondig in gevaar. Mense sou daaruit die gevolgtrekking kon maak: God se woord, God se beloftes het gefaal. Dit wat God belowe het, word nie ‘n werklikheid nie. Dit sou immers beteken: As God se beloftes aan Israel nie waar geword het nie, kan ‘n mens ook nie al God se ander beloftes vertrou nie. Die hele betoog in Romeine 9–11 stuur af op die konklusie dat God steeds getrou bly aan sy beloftes. God faal nooit om te doen wat God belowe het nie. Ook teenoor Israel. God bly selfs genadig teenoor diegene wat sy genade verwerp. Sy gawes is onherroeplik.

Ons word geroep om ook so passievol te wees. God se medewerkers deel God se passie vir weerbarstige mense wat op baie maniere deel gehad het aan God se goedheid en genade en dit eenvoudig nie wil erken nie. God gee nie op as sy eie mense hul rug vir Hom draai nie, en sy medewerkers moet God daarin navolg.