Matteus 4:12-23 – 22 Januarie
Derde Sondag na Epifanie
Die inleiding tot die preek kan goed aangepas word om ook by die familie-oomblik te gebruik. Speel ‘n uittreksel uit die liedjie en laat almal lekker saam gesels – via die liturg of in groepe soos families waarby mense wat die diens alleen bywoon, inskakel. Vra lekker vrae soos: wie is jou gunsteling superhero? As jy deur een van die superheros opgepas kan word, wie gaan jy kies en hoekom? Dan kan jy baie lekker (en eenvoudig) hierby aansluit soos wat die preekriglyn ook voorstel: Jesus is die enigste Here – die werklike hero. Daar is nog drie ander opsies!
Die preekriglyn val weg met die vraag: “Kan ek jou Superman, Batman, Ironman, Spiderman wees?” Ek sal jou oppas in die donker, vir jou ‘n hero wees. Ek sal die wêreld vir jou aanvat, vir jou ‘n hero wees. Kan ek jou hero wees in al die stories wat jy lees? So klink dié lied van die sanggroep Adam oraloor, ‘n lied waarin ‘n fiktiewe, gemaskerde held vra of hy mý held kan wees. Maar dit kan hy net doen as ek hom my held maak. Doen ek dit nie, dan is hy maar net ‘n strokiesprentheld met voete van klei. Sy vermoë om my te help verdwyn en is hy niks meer nie as enkele lyntjies op papier, ‘n verbeeldingsvlug in my gedagtes. En tog sing kinders die lied, en hulle trek so aan. Dit is die tema van kinderpartytjies en maskeraande. Video’s word op YouTube versprei, Afrikaanse sangers sing daarvan, stickers word gedruk en skole samel geld daarmee in. In my binneste is ek rustig daarmee dat ekself en my kinders in ‘n hero glo wat mensgemaak is. Word ek daarmee gekonfronteer, lag ek dit af as onskuldige pret en word ek geëtiketteer as ‘n spoilsport en langgesig-Christen.
Hierteenoor stel die Here duidelik Hy is die enigste Here (Hero) wat gister en vandag en ook môre dieselfde is. Hy is nie mensgemaak of fiktief nie, maar in Jesus is Hy die enigste Verlosser wat vir mense ‘n nuwe toekoms oopsluit. Met hierdie boodskap klim Jesus ná sy doop uit die Jordaanrivier en begin Hy ‘n lewensveranderende bediening wat Hom uiteindelik sy lewe aan die kruis op Golgota kos. Maar dan die hoogtepunt! Hy staan na drie dae op uit die graf waarna Hy terugkeer hemel toe en lewe tot in ewigheid. En hierdie Here (Hero) is nie afhanklik of ek Hom kies as my Here (Hero) nie. Hy sorg vir my deur dik en dun, Hy troos my en gee my krag, Hy verlos my van die sonde omdat Hy my eerste liefgehad het (Joh. 3:16). So breek Hy vir my ‘n nuwe toekoms oop, want Hy is Jesus Christus wat as Messias na hierdie wêreld gekom het.