Matteus 5:13-20 – 5 Februarie
Vyfde Sondag na Epifanie
Hier is ‘n baie oulike uitgewerkte byeenkoms met ‘n boodskap, idees vir aktiwiteite, inkleurprente, prente van verskillende soorte lig en ‘n doolhof-prent van praktiese maniere waarop ‘n mens sout en lig kan wees. Jon Stevens stel voor jy speel met glowsticks! Gesels oor hoe ‘n mens nie jou glowstick se lig gaan wegsteek nie. Jy wil hê mense moet dit sien. Dis dieselfde met Jesus. Ons het hierdie wonderlike geskenk. Ons gaan dit nie vir onsself hou nie, maar dit met almal deel! Jy kan ook die punt illustreer deur een van die kinders ‘n gekookte aartappel sonder sout te laat eet. (Of vis en tjips sonder sout!) Vra of die kind wil sout hê, gooi bietjie oor, vra hoe dit anders is – en gesels dan oor die verskil wat sout maak en hoe ons ander se lewens beter kan maak.
Ons vind in die Nuwe Testament verskillende beelde waarmee die identiteit en die taak van die kerk in die wêreld uitgebeeld word. Twee van die bekendste en treffendste beelde vind ons in Matteus 5:13-16. Hierdie verse noem die kerk sout van die aarde en lig vir die wêreld (1933/1953-vertaling). Die twee beelde of metafore sê wie die kerk is en wat die kerk se taak en roeping is. Dit funksioneer as ‘n soort program van werksaamhede wat Jesus hier uitwerk en aan die dissipels oorhandig vir uitvoering. Die twee metafore is ryk en diep aan betekenis. Ons kyk na enkele aspekte daarvan en hoe dit in ons konteks van toepassing kan wees.