Psalm 65 – 23 Oktober
Koninkrykstyd 20
Gebruik die beeld van die beskerming wat Dawid onder die vlerke van die Almagtige geniet (Ps 63:7). Vra die kinders of hulle al ’n hoender met kuikens gesien het. Brei uit oor hoe sy kloek-kloek na hulle soek en saam met hulle beweeg. In die aand sprei sy haar vlerke wyd uit sodat hulle styf onder haar kan inkruip, waar hulle veilig kan wees. Jy kan ook dramatiseer wat gebeur as daar gevaar sou dreig. Die hen sprei haar vlerke uit om haar groter en bedreigender te laat lyk en sy hou haar kuikens agter haar. Só sorg God vir ons en só beskerm Hy ons in gevaar. Onder ekstra stof word ook genoem dat Psalm 65 ’n lofsang is aan God vir al sy oorvloedige gawes. Dit sluit sy gebedsverhoring en vryspraak van skuld vir alle mense in (vers 2-3), ook die oorvloed van die goeie dinge wat Hy gee vir die geloofsgemeenskap. Gebruik ‘n oase in die woestyn – heelwat ekstra inligting is ingesluit oor oases – as metafoor vir God se voorsienigheid. Vertel die storie van ‘n oase en gebruik die deel van die fokusteks.
Psalm 65 handel ten diepste oor God se absolute toewyding aan en besorgdheid oor die skepping, mense (en Israel) ingesluit. God neem die inisiatief om mense uit te nooi na saamwees, en Hy seën dié wat die uitnodiging aanvaar om in sy teenwoordigheid te kom leef. Geseënde mense is dié wat by God wil wees soos wat God by mense wil wees: “God gee die oorwinnaarskroon vir dié wat met verlange uitsien na sy koms” (2 Tim 4:6-8). Die verhouding waarna God verlang, is nie oppervlakkig en eensydig nie. Dit is nie net ‘n verhouding waarin God die Een is wat gebede aanhoor en die skepping sommer vanselfsprekend onderhou nie. God reageer (lewendig) op mense se gebede en geloftes. God hoor nie net gebede nie, maar verhoor dit volgens sy wil en bestemming. Dit is juis dáárop wat mense in diepe vertroue, stil moet wag. Die wêreld waarin ons leef (veral ná 2020/2021) is een van geraas, ongeduld, oorweldiging en onsekerheid. In hierdie omstandighede moet ons Psalm 65 ontvang. Die psalm is ‘n getuienis van God se troue sorg in die onstuimigste en vreesaanjaendste tye. Soms mag dit voel of die uitdagings in ons lewe (dikwels ons eie sondes) soos ‘n rowwe see voor ons is. Dit is juis dan dat ons vir God daarin moet soek en vertrou. Om dit oor te dra, gebruik die digter vier beelde van water waarmee God in aanraking kom waarop in die preekriglyn uitgebrei word.