Jeremia 4:11-12, 22-28 – 11 September
Koninkrykstyd 14
Met Familietyd kan jy aansluit by wat ons in Jeremia 4 lees dat God se volk hom teleurgestel het deur sonde te doen. Daarom waarsku die Here die volk Israel dat Hy sy straf oor hulle sal laat kom. Die prentjie wat God gebruik om sy straf te beskryf vind ons onder andere in Jeremia 4, ‘n wind wat van die woestyn kom. Gebruik nou verskillende tekste in die Bybel om die ingeslote blokkiesraaisel op te los. Die preekriglyn sluit aan by die historiese omstandighede waarbinne Jeremia optree. Dit was ‘n tyd waarin Juda se geloof het al meer om die tempel gedraai en al minder om God. Die Judeërs het hulle egter misgis met God. Hulle het hulleself as slagoffers van die ryk en groot magte beskou, maar nooit na hulleself en hulle eie gedrag gekyk nie. Selfs in hulle donkerste tyd het hulle nie verantwoordelikheid vir hulle lewe, stad en gedrag geneem nie, want God sal voorsien, het hulle gedink. Nooit het hulle gedink God sal toelaat dat hulle oorval en verwoes word nie, selfs ten spyte van al Jeremia se waarskuwings. Dit lei tot hulle ondergang. Hierdie profesie van Jeremia laat ons ongemaklik voel omdat ons moet erken dit klink baie soos ons eie konteks. Ons leef ook in ‘n onseker tyd. Ons sukkel steeds om te erken dat ons geloof al meer oor ons dinge gaan eerder as oor vertroue in God. Dit moet ons tot selfondersoek lei.