24 Maart 2002
Palmsondag/Groot Lydensweek
LITURGIESE VOORSTEL (1)
Fokusteks: Matteus 27:11-54.
Ander tekste: Jesaja 50:4-9; Psalm 31:9-16; Filippense 2:5-11.
Vandag roep die kerk die openingsgebeurtenis van die Heilige Week in herinnering die triomfantlike intog van
Christus in Jerusalem.
In veral die Katolieke en Anglikaanse tradisies word daar op hierdie Sondag kruisies wat uit palmblare gevleg is by
die deure aan die lidmate uitgedeel. Die lidmate bewaar dan hierdie kruisies in hulle Bybels tot die aanvang van
Lydenstyd die volgende jaar met Aswoensdag, wanneer die kruisies verbrand word. Daar kan by hierdie tradisie
aangesluit word, in watter geval dit goed sal wees as die gemeentekinders vooraf betrek word by die vleg van die
kruisies.
Andersins kan die gemeente (of dié wat wil) met palmtakke (of ander takke) by die kerkdeure bymekaarkom (of voor
die aanvang van die diens hiervoor buitentoe gaan). Wanneer hulle dan inkom met die wuiwende palmtakke sing
die gemeente n gepaste lofsang waarin Jesus as Koning geloof word. Palmtakke kan ook gebruik word om die kerk
mee te versier. In ander kerktradisies is die optog met palmtakke heelwat verder weg van die kerk, sodat daar vooraf
gereël word om op n geskikte plek (weg van die kerk) en tyd voor die erediens bymekaar te kom. Maak veral seker
dat die kinders aan die optog deelneem.
Indien daar by hierdie tradisie aangesluit word, sal dit nodig wees om, behalwe vir die tekskeuse van die dag (Matt
27:11-54) ook die addisionele Jaar A-lesing vir Palmsondag uit die Matteusevangelie te lees, naamlik Matteus 21:1-
11.
Die twee Matteustekste bied die ideale geleentheid om die kontras tussen lippediens en die navolging van n
lydende Christus uit te beeld. Dis immers dieselfde mense wat "Loof Hom!" (Matt 21:9) én "Kruisig hom!" (Matt
27:22, 23) skreeu. Dit is n redelik lang Skriflesing en daar moet genoeg tyd hiervoor in die diens ingeruim word (dalk
met stilte of gepaste sang tussenin), sodat die lyding van die Here weer in herinnering geroep kan word.
Fokusteks: Matteus 26:14-27:66 (korter vorm: Matteus 27:11-56).
Ander tekste: Matteus 21:1-11; Jesaja 50:4-9a; Psalm 31:16-17; Filippense 2:5-11.
INLEIDING
Op Palmsondag word die intog van Jesus in Jerusalem gevier. Dit is egter ook die begin van die Groot Lydensweek
en moet derhalwe nie uitsluitlik as n triomfantlike geleentheid gevier word nie. Die intog wat herdenk word, is dié
van die Koning wat gekom het om te ly en te sterf. In die liturgiese voorstel wat hier aangebied word, word daar in
die eerste deel van die diens op die intog gefokus, terwyl die prosessie van die gemeente die oorgang bewerkstellig
na die tweede deel van die diens waar daar op die lydensverhaal gefokus word.
Die liturgiese kleur vir Palmsondag is dieselfde pers as vir die res van Lydenstyd, of n dieprooi wat dui op die bloed
van Christus wat op Goeie Vrydag gestort is. In baie kerke is dit die gebruik om kruisies wat van palmblare gevleg
is aan lidmate uit te deel (vind by die plaaslike Anglikaanse of Katolieke Kerk uit hoe dié kruisies gevleg word). Die
binnekant van die kerk moet so min moontlik versier word. Konsentreer op simbole van Christus se lyding, soos die
kruis en die doringkroon. Verkieslik geen blomme nie.
LITURGIESE VOORSTEL (2)
In sommige gemeenskappe is dit die gebruik om op Palmsondag n optog met palmtakke deur die strate te hou. Dit
kan n goeie geleentheid wees vir ekumeniese samewerking tussen nabygeleë gemeentes van verskillende denominasies.
GOD VERGADER ONS VOOR HOM
Die gemeente kom voor die aanvang van die erediens buite die kerkgebou byeen waar daar palmtakke aan almal
of aan n gedeelte van die gemeente (bv die kinders) uitgedeel word. Die voorganger verduidelik kortliks die doel
van die dag se feesviering deur byvoorbeeld te sê: "Ons het vandag saamgekom om die begin van Jesus se Groot
Lydensweek te gedenk. Ons dink vandag in besonder aan sy intog in Jerusalem toe Hy die stad binnegekom het
om sy verlossingswerk te voltooi: om te ly, te sterf en op te staan uit die dood."
Votum
Voorganger: Jubel en juig, want ons Koning kom na ons toe.
Hy is nederig en Hy ry op n donkie, op die vul van n pakdier.
Gemeente: Hosanna in die hoogste!
Voorganger: Prys die Seun van Dawid!
Loof Hom wat in die Naam van die Here kom!
Gemeente: Prys Hom in die hoogste hemel!
Voorganger: Laat ons na Hom toe gaan met lof,
laat ons Hom toejuig met lofgesange!
Lofsang
Psalm 118:1, 12, 13 (ou beryming of parallelstrofes in die nuwe Liedboek).
Skriflesing
Matteus 21:1-11.
Die gemeente beweeg hierna in prosessie in die kerkgebou in terwyl n lied (bv Ps 100:1-4/NSG 1) gesing word.
Die palmtakke kan voor in die liturgiese ruimte en/of in die paadjies neergelê word.
DIENS VAN DIE WOORD
Gebed
Skriflesing uit die Ou Testament
Jesaja 50:4-9a.
Psalmrespons
Psalm 31:10-17 (die parallelverse van die psalmomdigting in die nuwe Liedboek kan deur die gemeente of die koor
gesing word).
Skriflesing uit die Nuwe-Testamentiese briewe
Filippense 5:2-11.
Sang
n Geskikte Lydenslied, byvoorbeeld Gesang 131/NSG 107.
Skriflesing uit die Evangelies
Matteus 26:14-27:66 (of Matt 27:11-54). Die Skriflesing kan soos volg verdeel en afgewissel word met gemeenteen/
of koorsang: Matteus 26:14-29; 26:30-56; 26:57-75; 27:1-23; 27:24-50; 27:51-66. Daar word aanbeveel dat van
verskillende stemme gebruik gemaak word vir die voorlesing. As alternatief kan n toonsetting van die teks van die
lydensverhaal deur die koor gesing word.
Prediking
Dit kan kort wees om nie af te doen aan die krag van die lydensverhaal self nie.
Respons op die Woorddiens
Geloofsbelydenis
Gemeente: Ek glo in Jesus Christus, die eniggebore Seun van God die Vader,
Voorganger: Hy wat in die gestalte van God was, maar Homself verneder het deur die gestalte van n slaaf aan
te neem en aan mense gelyk te word,
Gemeente: wat gely het onder Pontius Pilatus, gekruisig is, gesterf het en begrawe is.
Voorganger: Hy het Homself verneder en was gehoorsaam tot in die dood, ja, die dood aan die kruis.
Gemeente: Hy het op die derde dag weer opgestaan uit die dood, opgevaar na die hemel en Hy sit aan die
regterhand van God die almagtige Vader.
Voorganger: God het Hom tot die hoogste eer verhef en Hom die Naam gegee wat bo elke naam is.
Gemeente: In die Naam van Jesus sal elkeen wat in die hemel/en op die aarde/en onder die aarde is,/die knie
buig,/en elke tong sal erken: Jesus Christus is die Here!
Voorganger: Tot eer van God die Vader.
Gemeente: Amen (verkieslik gesing).
Gebed
Offergawes
UITSENDING
Slotsang
n Gepaste lied, byvoorbeeld Gesang 186:2/NSG 156.
Seën
Aan God die dank! Hy voer ons saam in sy triomftog, omdat ons een is met Christus. Amen.
Teks
Die teks is te lank. Daar gebeur net te veel in hierdie klomp verse om enigsins in een preek daaraan reg te laat
geskied. Om so in die algemeen oor die lyding van Christus te preek deug nie. Daarom is n keuse nodig wat die
teksinhoud tot n hanteerbare tema beperk.
Ek het gekies om op die verhoor van Christus te konsentreer. Aanvanklik is hierdie keuse beïnvloed deur die feit dat
ek nog altyd geboei is deur Pilatus se rol in hierdie gebeure. Maar soos die teks in my hart gegroei het, het ek al
hoe meer bewus geword van n groter toneel waarin Pilatus net maar een van die rolspelers was. Al kan n mens
nie oor die lyding van Christus tydens sy verhoor preek sonder om sy regter, Pilatus, by name te noem en n bietjie
oor hom na te dink nie, bestaan die gevaar dat ons oor Pilatus kan preek ánders as wat Matteus oor hom praat.
Want wat voor ons lê, is n teks uit die boek Matteus.
Dié boek het nie in n lugleegte ontstaan nie. Die skrywer (waarskynlik n Christen-Jood die kerklike tradisie sê dit
was Matteus) het n pastorale doel gehad. n Mens kan dus nie net vra: Wat staan in die teks? nie. Jy moet ook vra:
Hoekom staan dit daar? Sonder n antwoord op die tweede vraag sal jy die eerste een maar sleg en hoogstens
gedeeltelik verstaan.
Wanneer ons sê dat die boek n pastorale doel gehad het, veronderstel ons daarmee n werklike gemeente in die
omgewing van 75 nC. Wie hulle was en waar hulle gebly het, weet ons nie. Uit n noukeurige lees van die boek en uit
agtergrondkennis oor die tyd en wêreld, kan ons aflei dat die gemeente n groter wordende heiden-Christenkomponent
gehad het. Waarskynlik het die gevaar van antinomianisme ook as gevolg daarvan toenemend kop begin
uitsteek. En in die gemeente so lei Combrink af het al hoe meer van hulle begin verval in materialisme,
sekularisme, onderlinge liefdeloosheid, geestelike laksheid, wetteloosheid en afvalligheid. Dit het die skrywer
bekommer. Daarom val die klem in hierdie boek minder op die genade waardeur ons gered word (soos by Paulus) as
op die oorvloediger geregtigheid wat in geredde mense se lewe sigbaar moet wees (soos by Jakobus). Die koninkryk
van die hemel het immers sy eie reëls moeiliker reëls as dié wat die Fariseërs so noukeurig nagekom het.
PREEKSTUDIE - MATTEUS 27:11-54
Jesus se opdrag aan die einde van Matteus (28:20): "Leer hulle om alles te onderhou wat Ek julle beveel het," sal
dus deurentyd ons lees van hierdie teks moet begelei.
Eksegetiese opmerkings
Eksegeties bied hierdie gedeelte geen probleme nie. Die woorde en sinne vertaal maklik en dit is nie moeilik om die
lyn van die verhaal te volg nie. Kortliks opgesom, verhaal Matteus die gebeure se verloop só:
Pilatus en Jesus
1. Pilatus se vraag (v 11a-c);
2. Jesus se antwoord (v 11d);
3. Jesus se swye voor sy beskuldigers (v 12);
4. Pilatus se tweede vraag aan Jesus (v 13), en
5. Jesus se voortgesette swye (v 14).
Pilatus en die volk/aanklaers?
1. Inligting: die gebruik om n gevangene vry te laat (vv 15-16);
2. Pilatus se eerste vraag aan die skare (vv 17-18);
3. Procla probeer Pilatus oorreed om Jesus vry te laat (v 19);
4. Die geestelike leiers probeer die volk oorreed om Jesus te laat doodmaak (v 20);
5. Pilatus se tweede vraag aan die skare (v 21);
hulle kies Barabbas;
6. Pilatus se derde vraag aan die skare (v 22a);
hulle roep: Laat hom gekruisig word (vv 22b-23).
Wie se skuld is die dood van die Onskuldige?
1. Pilatus spreek homself vry, maar glo heimlik dat hy skuldig is (v 24);
2. Die volk aanvaar skuld, maar glo heimlik dat hulle onskuldig is (v 25), en
3. Jesus word oorgelewer om gekruisig te word.
Konteks
Die drama wat hom in hierdie verse voor ons oë afspeel, is nie net gelaai met paradokse nie, maar ook met ironie.
Sowel paradoks as ironie het n manier om die vyeblare van ons lyf te stroop. Dít gebeur veral hier waar die "skuld"-
vraag hom onontwykbaar aan ons opdwing omdat ons as "toeskouers" van hierdie dramatiese gebeure by n hofsitting
betrek word.
Normaalweg is dit die aangeklaagde se skuld wat in die hof ter sprake is. Niemand verwag n uitspraak oor die regter
of die aanklaer se skuld nie. In hierdie hofsaak weet Matteus se lesers by voorbaat dat die aangeklaagde geheel
en al onskuldig is. Die regter het maar n minuut of twee nodig om tot dieselfde konklusie te kom. Jesus se verhoor
eindig dus amper so gou as wat dit begin het. Daarna swaai die gebeure subtiel om en begin die regter en die aanklaers
hulleself verhoor. Húlle word onopsigtelik gedwing om oor hulle eie skuld uitspraak te lewer dít is die groot
ironie van hierdie gedeelte. Dié ironie word verder verhoog deur die volgehoue swye van Christus se kant. Toe Hy
eenmaal erken het dat Hy koning is, het Hy immers ook by implikasie daarmee gesê dat Hy die finale regter is. Al
erken nóg Pilatus nóg die Jode hierdie aanspraak van Jesus bewustelik, begin hulle onmiddellik spartel met die
vraag na hulle eie skuld. Dit is asof hulle voor die Swygsame Regverdige/Regter onafwendbaar in n innerlike
tweestryd beland. Hulle word deur hulle gedagtes aangekla of vrygespreek (Rom 2:15). Dat dít n belangrike aspek
van hierdie teks is, moet ons sommer nou reeds raaksien. Barth het gesê dat die res van die teologie juis hiervan
afhang, dat dit die Regter is wat in ons plek tereggestel word (KD IV 1, p 100). Maar dat dit nie ál is wat die teks vir
ons te sê het nie, moet ons ook weet. Daar is ook nog die paradokse waarmee ons gekonfronteer word.
Die eerste groot paradoks van dié stukkie drama is dat die enigste "slegte" persoon, die berugte moordenaar wat
reeds skuldig bevind en gevonnis is Barabbas ook as die enigste werklik vrygespreekte mens hier wegstap.
Terwyl die "goeie" mense in hierdie verhaal die gevangenes van hulle eie skuld word. Pilatus probeer baie hard om
homself te verontskuldig maar sy vryspraak van homself oortuig ons as toeskouers glad nie. Dit is immers
glashelder dat hy ten spyte van sy handewassery so skuldig voel dat hy iets kan oorkom. Hy het mos reeds erken
dat Jesus onskuldig is. Om n onskuldige, weerlose mens sommer so vir die wolwe te gooi moet selfs n mens soos
Pilatus raak.
Die Jode, daarenteen, se vrolike vrymoedigheid om Jesus se bloed oor hulle en hulle kinders te laat kom, is alles
behalwe n egte skuldaanvaarding. Dit kom tog ooglopend uit hulle geestelike leiers se sekerheid dat Jesus God
gelaster het en uit hulle oortuiging dat dit eintlik sy wil is dat hierdie mens wat sy Naam so misbruik "nie ongestraf"
sal bly nie. Die paradoks: soos Pilatus homself vryspreek al weet hy dat hy skuldig is, so aanvaar die Jode skuld al
weet hulle dat hulle onskuldig is.
Die Good News Bible het Prediker 7:29 só vertaal: This is all that I have learnt: God made us plain and simple, but
we have made ourselves very complicated. As die Regter nie in ons plek veroordeel en tereggestel is nie, was dit
ikabod met die hele boel van ons. Wanneer n mens hierdie ingewikkelde prentjie van menswees diep genoeg bedink,
kom jy voor n ongemaklikheid met jouself te staan. Want dan begin jy daarmee rekening hou dat jy self al,
waarskynlik juis in jou vroomste oomblikke, lynreg teen God se wil in gehandel het. Voor jy te gou jou hande in
onskuld was, selfs al gebruik jy Jesus se bloed daarvoor, moet jy eers die gesig van jou eie skuld toelaat om ernstig
na jou terug te kyk uit die spieël van hierdie teks en moenie soos die kyker in Jakobus 1:22-26 te gou vergeet wat
jy gesien het nie.
Dat Jakobus hier ter sprake kom, is ook weer nie toevallig nie. Daar is reeds na die "merkwaardige ooreenkomste
tussen die Jakobusbrief en die Matteusevangelie" (Combrink) verwys. Op hierdie punt moet ons egter n bietjie
langer daarby stilstaan. Met die preek van enige teks uit Matteus sal ons die volgende woorde van Combrink baie
goed moet onthou:
"Met n duidelike pastorale bewoënheid (sic) rig Matteus sy Evangelie aan mense wie se eerste liefde verflou het
en roep hy hulle op tot n terugkeer na Jesus. Jakobus se nadruk op geloof wat in dade tot uiting moet kom, is alom
bekend.
"Uit Matteus is dit egter duidelik dat Jesus verwag dat die wil van God, die geregtigheid van die koninkryk, vervul,
gedoen moet word (5:20, 48; 6:33). Die bergrede word afgesluit met n skerp waarskuwing teen woorde alleen (7:21)
sonder die doen van God se wil en die dra (doen!) van vrugte. Die verskil tussen ware en valse profete, goeie en
slegte bome, n huis op die rots en n huis op die sand is alleen die doen van die wil van God en die woorde van
Jesus (7: 21, 24, 26).
"Hierdie beklemtoning loop soos n goue draad dwarsdeur hierdie Evangelie. Vergelyk Jesus se veroordeling van
die Fariseërs in 3:8-10 as bome wat nie vrugte dra nie, asook 15:7-9; 23:2v. Dit is egter steeds n oordeel wat vir
elke hoorder van die Evangelie wat nié doen nie, wag. Dit blyk onder meer ook uit 21:28-32 waar dade gevra word
en in 21:43 waar die koninkryk van God gegee word aan n volk wat vrugte lewer (poioûnti toùs karpoùs). En hulle
wat die wil van die Vader in die hemel doen, geld as broers en susters van Jesus (12:49v). Hierdie beklemtoning
het tot gevolg dat die doen van die geregtigheid sodoende tot een van die mees wesenlike kenmerke van die
dissipels in die Matteusevangelie word." Tot sover Combrink.
Ons mag dus nie n teks uit Matteus gebruik om net oor die indikatief van die genade ("die Regter is vir ons veroordeel
en tereggestel") te praat nie. Want die hele boek is bedoel vir mense wat rééds uit genade gered is, maar nie
die vrugte dra wat by die bekering pas nie. Die skrywer se bedoeling is waarskynlik dat ook die verhaal van Jesus
se verhoor moet lei tot selfondersoek by ons n selfondersoek wat moet uitloop op dade van oorvloediger
geregtigheid.
Oorvloediger geregtigheid is geregtigheid wat oorvloediger is as dié van die skrifgeleerdes en die Fariseërs. Hulle
het die eintlike eis van die wet barmhartigheid nagelaat terwyl hulle hulle met allerlei streng reëls en regulasies
besig gehou het (23:23; vgl 5:44, 48). In hierdie geval waar hulle Jesus se kruisiging voor oë het het hulle God
se eer probeer beskerm; maar juis omdat daar geen barmhartigheid in hulle gehoorsaamheid was nie, het hulle
presies die teenoorgestelde reggekry. Want sonder dat hulle besef het wat hulle doen (Luk 23:34), het hulle vir Hom
aan n vloekhout, naak en in skande, laat sterf. Telkens wanneer die barmhartigheid ontbreek in ons vroomste
veroordeling van dié wat ons as die onbelangrikstes ag, haal ons oor onsself die paradoks van God se eer wat met
ons beskerming tot sy skandpaal word, en van sy reddende bloed wat deur ons geregtigheid vir ons tot n oordeel
word (Matt 25:40, 45).
Die verdere ironie van die geskiedenis is dat Christene deur die eeue heen die Jode vervolg en vernietig het (kyk
na die Griekse teks by 27:20 ajpolevswsin!). En ons het dit gedoen omdat ons geglo het dat die Jode dit verdien:
"Hulle het Christus mos laat kruisig." So het ons as Christene met ons onbarmhartigheid presies net so gesondig
soos die Joodse leiers destyds. Partykeer is die ergste ding wat met enige mens kan gebeur dat hy of sy in die
hande van "goeie" mense val.
Dat ons nie regtig oor hierdie gedeelte kan preek sonder om ook vir die gemeente iets oor die Jode en hulle skuld
aan Jesus se dood te sê nie, staan vas. Want daar is vandag steeds mense by wie die misverstand bestaan dat die
Jode alles wat deur die eeue met hulle gebeur het, verdien het. Wat dit betref, gee ek graag hier onder n redelik
volledige aanhaling van Hagner se uiteensetting in die Word-kommentaarreeks. Hy skryf:
"... there can be no mistaking the fact that Matthew portrays the Jews in an exceptionally bad light. The words
recorded in v 25, his blood be upon us and upon our children, to some extent also reflect the hostility between
Matthews church and the synagogue that characterized the last half of the first century. That hostility, I have argued
(see Hagner, Matthew 1-13, lxxi-lxxiii), was between Jews, those who had accepted Jesus as their Messiah and
those who had not. That there would be especially strong feelings in the first generation of disagreement is
understandable. This particular verse, sad to say, has been used to justify Christian persecution of the Jews down
through the centuries. Regarding Jesus as the incarnation of God, Christians of subsequent generations found it
easy to think of Jews as guilty of decide. It is as shocking as it is true that anti-Semitism accordingly became a
Christian virtue, indeed, a Christian duty. After all, had not the Jews all but wished revenge upon themselves in the
words they spoke to Pilate? We may only hope and pray in this post-Holocaust era that Christians no longer need
to be told how unthinkable such a conclusion is and what a tragic abuse of v25 it is to use this statement in support
of anti-Semitism. The salvation enjoyed by gentile Christians is in reality the gift of the Jewish people by whom it
has come, as the Fourth Evangelist puts it (John 4:22), and with that Matthew would have no reason to disagree (cf
1:1). It is right therefore for Christians to honor the Jews, for the light that has dawned in Christ is also meant to be
glory to Gods people Israel (Luke 2:32; and again Matthew would not disagree). As for the responsibility for the
death of Jesus, theologically there is only one possible answer: it is sin, the universal malady of all human beings,
that drives Jesus to the cross. The crucifixion is in this sense a piece of the autobiography of every man and woman
ever to walk this earth. It is I who am guilty of crucifying Jesus."
Ons sal eweneens nie oor hierdie gedeelte kan preek sonder om die rol van Pilatus vlugtig onder die loep te neem
nie. Behalwe vir Maria, is hy immers die enigste ander mens wat in die Apostolicum genoem word. Sondag ná
Sondag word hy in baie tale dwarsoor die wêreld heen onthou as die een onder wie Jesus gely het. Dit is wat Procla,
Pilatus se vrou, in haar nagmerrie beleef het. Altans, so het die skryfster Dorothy Sayers in haar boek The man who
would be King Procla se droom vir haar lesers voorgestel. Procla hoor hierdie refrein en laat weet vir Pilatus: Ek het
veel gely ... Maar dit is die fiksie oor Pilatus. Wat is die feite?
Pilatus was die Roomse Prefek van Judea. Hy het diens aanvaar in die jaar 26 nC en sy pos tien jaar lank beklee.
Min wetende dat dít die beslissendste paar jaar in die geskiedenis van die mensdom sou wees en dat hy ex officio
in die sentrum sou wees van dié gebeure wat die geskiedenis radikaal sou verander.
Van sy persoonlike lewe weet ons nie veel nie. Buiten dít wat die Bybel oor hom skryf, is daar hoofsaaklik net die
twee Joodse geskiedskrywers Flavius Josephus en Philo wat iets meer oor Pilatus vertel. En hulle het niks van hom
gehou nie. Ons moet dus rekening hou daarmee dat hulle hom dalk in donkerder kleure geskilder het as wat regtig
nodig was. Hy het immers besonder lank daarin geslaag om sy base gelukkig te hou. Tien jaar in so n pos sonder
om in die pad gesteek te word, was blykbaar nie n geringe prestasie nie.
Maar dat die Jode hom nie kon veel nie, is n feit. Ons kan hulle nie te erg kwalik neem daaroor nie. Hyt immers n
moedswillige (dalk domastrante) streep gehad. Dít het met die intrapslag duidelik geword. Hy het sy soldate toegelaat
om hulle vaandels met n afbeelding van die keiser daarop Jerusalem binne te bring. Dit was mos nou moeilikheid
soek! En hy het dit geweet. Daarom het hy dit in die nag laat doen. Toe die Jode die volgende oggend wakker word,
moes hulle hierdie gruwel aanskou. Maar Pilatus het sleg tweede gekom. Want die Jode het en masse met n taktiek
van niegewelddadige verset gekom. Toe die soldate dreigend swaard in die hand nader staan, het die opstandelinge
op die grond gaan lê en hulle nekke ontbloot. "Kom, sny ons dan maar keel af, as jy dan nou wil," was die boodskap.
Selfs Pilatus het nie daarvoor kans gesien nie en sy soldate beveel om die vaandels uit die stad te neem. Al het hy
die Jode n keer of wat daarna met geweld op hulle baadjie gespeel, het hy homself waarskynlik kort-kort daaraan
herinner om hulle nie weer onnodig tot n opstand uit te lok nie. n Mens soek nie moeilikheid as jy nie honderd persent
seker is van n oorwinning nie. En jy stamp jou ook mos nie sommer twee maal teen dieselfde klip nie.
Dié gebeure moes vlak in sy gedagtes gesit het toe die oproerige klomp met Jesus by hom aangekom het. In
Matteus se weergawe van Jesus se verhoor voor Pilatus kom iets daarvan uit die ink. Die Boodskap vertolk dié
gedeelte so: "Pilatus het agtergekom dat hy dit nie gaan regkry om Jesus los te laat nie. Die mense het net al hoe
rumoeriger geword. Hy het besef dat dit n oproer kon veroorsaak."
Dit was nogal n onbenydenswaardige posisie waarin Pilatus hom bevind het. Aan die een kant maak die teks dit vir
ons duidelik dat hy n opstand voor sy oë kon sien uitbroei as hy nie versigtig was nie. Hy sou dit kon onderdruk
maar teen watter prys? Moet een man dan nie opgeoffer word om die lewens van baie ander te spaar nie?
Aan die ander kant, dít maak die teks ook vir ons duidelik, was Pilatus in sy hart van Jesus se onskuld oortuig. Boonop
was daar nog die nagmerrie wat Procla, sy vrou, gehad het. Wat maak n mens wanneer jy iemand soos Jesus
ontmoet ("Ek vind geen skuld in hierdie man nie") en jy word moreel gedwing om Hom n paar minute later tot die
dood te veroordeel? Jy was dan maar jou hande in onskuld. Maar, ons het reeds vir onsself uitgemaak dat dít nie
werk nie.
In die etiek is die hele kwessie rakende die "botsing van pligte" n bekende problematiek. Dit kan oor ernstige sake
gaan, soos wanneer daar gekies moet word tussen die lewe van n ma en haar ongebore kind. Maar dit kan ook
gaan oor sake soos n vrou wat trots haar nuwe kapsel vir jou wys. As jy eerlik wil wees (jou plig!), moet jy sê haar
hare lyk aaklig. Maar as jy wil liefhê (jou plig!), kan jy haar ooglopende vreugde oor hoe sy vir haarself lyk nie demp
nie. Dan lieg jy maar wit. "Dit pas jou!" sê jy. Maar al was jy jou hande ook tot hulle bloei in onskuld, die vlekke kry
jy nie af nie. Wanneer jy oor jouself dink, weet jy dat ook jy op jou beste maar n leuenaar is. Daarom moet ons maar
nie te gou en te hard oor Pilatus oordeel nie. Vir ons is dit duidelik dat hy die verkeerde keuse gemaak het. Maar
vir hom was dit waarskynlik in daardie stadium nie heeltemal so eenvoudig nie. Hy het mos nie die voordeel van
agternakennis gehad nie.
As ons elke Sondag met die opsê van die geloofsbelydenis opnuut van die splinter in Pilatus se oog bewus word
sonder om n slag in sy skoene te staan, sal ons nooit die diepte kan peil van ons eie menslike ellende en die skuld
oor die keuses wat ons teen wil en dank verkeerd maak nie. Ons sal ook nooit die genade van die kruis tot volle
vrede oor ons hart kan voel spoel nie.
Aangrypend mooi het Dirkie Smit onlangs in die gemeente Welgelegen op Stellenbosch, Kaap oor die lyding van
Christus onder Pilatus gepreek (die teks hiervan is ongelukkig nêrens gepubliseer nie hierdie aanhaling kom uit
n transkripsie van die preek wat by die kerk uitgedeel is):
"Hy is gekruisig onder Pontius Pilatus, bely Nicea, maar saamgetrek in dié naam is almal wat aandadig was aan sy
kruisiging. Die Joodse volk, ja, met hulle leiers, godsdienstig en kultureel; die massa, die skare, die openbare wil en
mening; ja, die heidennasies en hulle leiers, die nie-Joodse ongelowiges; die Romeinse beskawing en ryk, kennis
en kultuur, waarheidsoeke en regsisteem; ja, die ganse mensheid; julle, sê Petrus, ons. Ons, tot vandag toe, ons
almal. Sy eie mense, sou Johannes met verwondering en droefheid sê. Omdat ons die duisternis liewer gehad het
as die Lig (Joh 1:1-11; 3:16-21).
"Deur die eeue het mense dikwels gewonder oor die vraag waarom Pontius Pilatus by name vermeld word in die
vroeg-Christelike geloofsbelydenisse. Daar is waarskynlik verskillende redes voor. Maar dít is n wesenlike deel
daarvan. Hy staan daar namens ons. In ons plek. Hy verteenwoordig ons almal in die belydenis van die kerk, in die
verhaal van Jesus wat sit aan die regterhand van die Vader. Sy naam staan daar as ewige herinnering aan ons
aandeel in die storie van hierdie Jesus. Dat dit ons skuld is dat Hy gekruisig is.
"Maar ons kan dit ook maklik misverstaan. Pontius Pilatus staan nie daar as herinnering aan ons slegste oomblikke
nie, maar aan ons beste. Nie aan ons boosheid nie, maar aan ons prestasies, ons suksesse, ons hoogste strewes,
ons roem, ons grootsheid.
"Dit is die merkwaardige.
"Pontius Pilatus daarvoor moet n mens die Evangelies aandagtig gaan lees én die aangrypende weergawes van
die verhoor van Jesus soos byvoorbeeld by Johannes is die verteenwoordiger van die Romeinse Ryk en
beskawing, menslik gesproke n hoogtepunt van menslike ontwikkeling en trots. Hy is n regter van die Romeinse
regsisteem, wat ons tot vandag nog waardeer en eerbiedig. Hy is n simbool van die kulturele hoogbloei wat ons tot
vandag toe nog die klassieke tyd noem, in taal, in kennis, in filosofie, in argitektuur, in wetenskap, in kuns. Hy vra
uitdruklik na waarheid, soos die denkers en geleerdes van sy tyd gedoen het. Hy worstel om skuld en onskuld uit
te vind, om reg te laat geskied. Hy bied genade en amnestie. Hy luister na die wense van die godsdienstige leiers,
wat in miskien die mees ontsettende dramatiese hoogtepunt van Johannes se beskrywing woedend, buite
hulleself, sonder om te begryp wat hulle doen, skreeu: Ons het geen ander koning as die keiser nie! (Joh 9:15).
"Pontius Pilatus staan as ewige herinnering aan ons mislukking, nee, meer, ons aandadigheid aan die kruisiging van
hierdie Jesus. Sy naam bly behoue in die belydenis van die kerk van die eeue as n stuk kritiek op ons, n stuk
ontmaskering, n stuk ontbloting, van wie ons waarlik is en wat ons waarlik bedink en doen, selfs in ons beste
oomblikke. In ons hoogste strewes. In ons grootste prestasies.
"God is nie maar net n ander naam vir wat goed en mooi en waar is onder ons mense nie. Inteendeel. Deur die
eeue van die geskiedenis van die mensheid het ons graag so gedink. Het ons die woord God gebruik as ons goed
gevoel het oor wat ons bereik het of wou bereik, die woord goddelik as ons die hoogste waardes, strewes, ideale
en prestasie van ons gees wou naam gee. Het ons graag gedink God is maar net ons-op-ons-beste.
"Maar die naam van Pontius Pilatus in die belydenis van die kerk van die eeue herinner ons daaraan dat dit nie so
is nie. Dat daar vir die ware God, wat waarlik goed is, en mooi, en waar, in óns geskiedenis, in óns wêreld, in ons
eie lewe, eintlik net plek is aan n kruis. Uitgedruk, weggestoot, onwelkom, aan n vloekhout. Dat die enigste manier
om Hóm te ken vir ons in óns wêreld deur lyding en kruis is. As God in ons wêreld verskyn, kruisig ons Hom."
Dit is so mooi dat die versoeking om dit net so oor te neem baie groot is. Tog moet ons rekening hou daarmee dat
prof Dirkie Smit se preek die Nicea-belydenis as teks het, en nie Matteus 27 nie. Daarom sal ons by hom kan leen,
maar nie sonder om die lyne wat reeds getrek is uit die oog te verloor nie.
Preekvoorstel
Voor n mens met die preekmaak self begin, help dit gewoonlik om dít wat jy van die teks verstaan het, in n enkele
boodskapsin te formuleer. In daardie sin gaan dit om die wat-vraag. As n tweede stap kan jy jou dan afvra wat die
teks, en dus jou preek, met die gemeente wil bereik. Dit is die hoekom-vraag.
Een moontlike manier om die wat-vraag vir n preek oor hierdie teks te beantwoord is: Ons wat gered is deur die
onregverdige lyding en dood van ons regter Jesus mag nooit ophou om met liefde en barmhartigheid teen alle
veronregting van mense te veg nie.
En wat moet hierdie preek bereik? Hoekom preek ons dit? Een moontlike antwoord is: Sodat die gemeente bewus
kan wees van hulle roeping om met liefde en barmhartigheid teen alle vorme van onreg te veg.
Hier onder volg n voorstel vir n preek oor hierdie gedeelte. Dit is net n paar lyne, of om dit met n ander metafoor
te sê: die geraamte. Die vleis van n werklike preek sit gedeeltelik hier bo. Die ander deel is saam met die vel te
vind in die gemeente vir wie jy moet preek.
Deur die loop van die eeue is verskillende antwoorde gegee op die vraag wat dit dan beteken dat ons gered,
versoen, verlos word deur Jesus. Geleerdes meen dat elkeen van die antwoorde tot een van drie basiese tipes
teruggevoer kan word. Een van die oudste antwoorde (Aulén noem dit die klassieke versoeningsleer) is dat ons
gered is uit die mag van die duiwel, sonde en dood. Verlossing beteken dat ons bedreig is deur n mag van buite.
Jesus het hierdie mag oorwin. Ons is gered. Daar is vandag nog kerke waarin die klem veral op hierdie aspek val.
Daarom praat hulle veral daaroor dat mense uit die mag van die Bose bevry moet word en dryf dan ook graag
duiwels uit die mense uit.
So n bietjie later in die geskiedenis het Anselmus van Kantelberg dit anders geformuleer. Ons groot probleem is
ons skuld voor die Here. Daarom moes Jesus kom om ons skuld vir ons te betaal. Hy is in ons plek gekruisig. God
se oordeel het Hom getref. Daarom ontvang ons die vryspraak uit genade alleen. Dit is die antwoord wat vir ons
gereformeerde gemoed die naaste aan die Bybel se spreke lyk. Daarom praat ons veral oor skuld en vergifnis. Ons
dink minder oor verlossing as vry word van die magte, en meer daaroor as om vry te wees van skuld. Daarom speel
die lees van die wet en die skuldbelydenis en vryspraak so n groot rol in ons erediens.
Nog later het n baie interessante man met die naam Petrus Lombardus en n hele klompie volgelinge in die
daaropvolgende eeue n derde manier geformuleer om oor versoening of verlossing te dink. Ons word deur die
voorbeeld van Jesus se liefde en deur die skok oor wat mense aan Hom gedoen het, gedwing om anders te begin
lewe, om ons saak met God reg te maak. Versoening is nie iets wat buite ons plaasvind nie, maar in ons. Deurdat
ons hart verander wanneer ons die verhaal van Jesus lees.
Natuurlik kan ons dadelik aan n groot klomp besware dink. Soos Lombardus dit gesê het, kan ons hom dit nie regtig
nadoen met die Bybel in die hart nie.
Maar ons sal n groot fout maak as ons nie raaksien nie dat in al drie hierdie sieninge aspekte van die Bybelse teks
is waarna ons eenvoudig moet luister. Veral Lombardus wat die verste van ons staan, verdien dat ons die fynste na
hom luister. Want ons het ook nodig om te hoor dat verlossing nie net beteken dat ons bevry word van die mag van
die duiwel nie. Of dat verlossing nie net opgesom kan word met skuldvergifnis uit louter genade nie. Maar dat
gehoorsaamheid aan die Here wat ons gered het n onlosmaaklike deel van die evangelieboodskap is veral van
die Evangelie soos Matteus dit aan ons vertel. Want wat hy by Jesus gehoor het, het hom oortuig dat as ons
geregtigheid nie oorvloediger is as dié van die Fariseërs en die skrifgeleerdes nie, ons soos mense is wat ons huis
op sand gebou het. Die Here eis dat ons radikaal sal liefhê. En hierdie liefde neem verskillende vorme in
verskillende omstandighede aan.
Daarom vertel Matteus ook die verhaal van Jesus se verhoor oor.
Natuurlik wil hy hê dat ons daarin sal raaksien dat dit in ons plek was wat Jesus gesterf het. Dat dit ons sonde is
wat Hom die dood gekos het (kyk na die aanhaling uit prof Smit se preek oor Pilatus.) As dit nie so was nie, was
daar geen evangelie nie, en was ons almal verlore.
Maar hy wil terselfdertyd hê dat ons sal raaksien hoe goeie mense die Joodse leiers met Jesus gemaak het. En
hy wil hê dat ons sal raaksien hoe Pilatus met n goeie doel onreg pleeg, maar dat dit steeds n onreg bly waarvoor
Jesus moes sterf. As n mens dít eenmaal met jou hart verstaan het, word jy n vegter teen onreg.
Want onreg is oral in ons samelewing. Dit is oral om ons, en soms in ons. Luister maar hoe dikwels iemand wat nie
teenwoordig is nie in gesprekke "verhoor" word. (Gee voorbeelde uit eie omgewing. Pas net op. Dit is nie net
gemeentelede wat onreg ly nie. Is daar in ons praat en doen teenoor plakkers en ander van die armstes in die
samelewing nie dalk ook n stuk onreg nie? Is daar op ander terreine in die breër samelewing ook onreg waarteen
ons moet veg? Is aborsie nie dalk onreg teenoor die hulpeloosstes nie?)
Maar, en dit is die groot maar: As ons veg teen onreg moet ons dit nie doen met die selftevredenheid waarmee die
Joodse leiers Jesus oorgegee het om gekruisig te word nie. Ons moet dit doen met die barmhartigheid en liefde van
Christus. En met die nederigheid van mense wat weet dat ons oordele nie suiwer is nie. En met die wete dat ons
soms selfs n onreg pleeg wanneer ons iemand anders oor n vermeende onreg veroordeel. En met die wete dat
mense wat onreg doen, soos Pilatus, soms die verkeerde besluit neem omdat dit vir hulle na die beste uitweg uit n
moeilike situasie lyk. Dink byvoorbeeld aan n jong meisie wat n aborsie laat doen omdat sy andersins die lewe
vorentoe onmoontlik gaan vind.
Maar by dit alles is daar n troos. Die mag van die duiwel is verbreek. En ons skuld is vergewe. Daarom kan ons
met liefde dit vir ander help moontlik maak om te lewe.
Bibliografie
Kommentare: Walter Grundmann (THZNT); Hagner (WBC); Gerhard Maier (ECB2); Rudolf Schnackenburg (DNEB).
Ander: Aulén, Gustaf 1975. Christus Victor. London. Combrink, H J B et al 1980. Handleiding by die Nuwe
Testament IV. Pretoria. Lochmann, Jan Milic 1977. Versöhnung und Befreiung. Gütersloh. Pannenberg, Wolfhart
1972. The Apostles Creed. London. Thielicke, Helmut s j. Ik Geloof. Wageningen. Van Ruler, A A s j. Ik Geloof.
Nijkerk.